Gjilan.AL

G-Lan City

Trajneri fajson Ronaldon për eliminimin e Al-Nassr

Al-Nassr nuk ia doli në gjysmëfinalen e Superkupës së Arabisë Saudite pasi u mposht 3-1 nga Al-Ittihad.

Një eliminim dhe rezultat i cili nuk ka lënë aspak shije të mirë te skuadra, trajneri dhe për më tepër te Cristiano Ronaldo, i cili në këtë përballje zhvilloi ndeshjen e dytë zyrtare me skuadrën e tij të re dhe u mjaftua me vetëm një goditje në portë.

Në përfundimin e ndeshjes, trajneri i Al-Nassr, Rudi Garcia, fajësoi pjesërisht portugezin për eliminimin, me francezin i cili priste diçka me shumë nga pesë herë fituesi i Topit të Artë.

“Natyrisht që nuk jam i lumtur, prisja shumë më shumë nga skuadra, të paktën nga elementët që janë në gjendje të bëjnë diferencën. Një nga gjërat që mund të ndryshonte rrjedhën e ndeshjes ishte ai rast i shpërdoruar nga Cristiano në pjesën e parë.

Ai moment mund të ndryshonte fatin e ndeshjes dhe do të kishte tjetër kurs, por ajo çfarë ndodhi nuk ndryshohet më. Përgëzoj kundërshtarin, ata luajtën mirë në pjesën e parë, ndërsa ne dominuam në pjesën e dytë, por vuajtëm mungesën e finalizimit. Sulmi ynë nuk ishte aspak në lartësinë e duhur dhe ne nuk ishim në gjendje për të ndryshuan fatin e ndeshjes. Tani do të fokusohemi në kampionat të rikthejmë titullin kampion,” – tha Rudi Garcia.

Këto fjalë janë përkthyer si një “thumbim” për portugezin, pasi goli i vetëm për Al-Nassr u realizua nga braziliani Talisca. Ronaldo kishte mundësinë e artë të shënonte në pjesën e parë, një moment i cili ndryshoi takimin, sepse në aksionin e radhës Al-Ittihad realizoi golin e dytë, duke i dhënë një goditje të fortë skuadrës së Al-Nassr, skuadër që tregoi një mungesë të theksuar në vizion dhe saktësi përpara portës së kundërshtarit.